काठमाडौँ । बेलायतको सानो पिज्जा चेन ‘नेपोली अन द रोड’ ले इटालीका चर्चित पिज्जा पसललाई पछि पार्दै विश्वकै नम्बर एक पिज्जा चेनको उपाधि जितेको छ।

इटालीको नेपल्सस्थित तेआत्रो मर्कदांतेमा आयोजित ‘५० टप पिज्जा’ पुरस्कारको १०औँ संस्करणमा ‘नेपोली अन द रोड’ पहिलो भएको हो । यसअघि सातमध्ये छ वर्ष इटालीका पिज्जा पसलले शीर्ष स्थानमा कब्जा जमाएका थिए ।

गोप्य निरीक्षकले स्वाद, सामग्रीको गुणस्तर, मौलिकता र खानाको अनुभवका आधारमा मूल्यांकन गरेका थिए । ३४ वर्षीय संस्थापक तथा मुख्य परिकार बनाउने मिकेले पासकेरेल्लाले यो सफलता पिज्जा क्षेत्रको ‘ओस्कार’ जस्तै भएको बताएका छन् ।

पासकेरेल्लाले इटालीको कासेर्तामा पिज्जा बनाउन सिकेका थिए । उनले लन्डनको चिसविक, रिचमन्ड र सोहोमा तीनवटा पसल सञ्चालन गरिरहेका छन् । खाद्य गाडीबाट सुरु भएको उनको व्यवसाय अहिले तीन स्थायी पसलमा विस्तार भएको हो ।

पासकेरेल्लाले सन् २०२३ मा ‘विश्वकै उत्कृष्ट पिज्जा निर्माता’को उपाधि पनि जितेका थिए । यसपटक भने उनले इटालीका चर्चित पिज्जा पसलसँग प्रत्यक्ष प्रतिस्पर्धा गर्दै विश्वकै शीर्ष स्थान हासिल गरेका हुन् ।

शीर्ष १० मा ‘उना पिज्जा नेपोलिताना’ अमेरिकाको न्युयोर्क दोस्रो, ‘कन्फाइन’ इटालीको मिलान तेस्रो र ‘आई मसानीली’ इटालीको कासेर्ता चौथो स्थानमा रहेका छन् । लन्डनको ‘नेपोली अन द रोड’ शीर्ष १० मा पर्ने बेलायतको एक मात्र पिज्जा पसल बनेको छ ।

‘नेपोली अन द रोड’को सफलतामा ‘चिजविक’ नामक विशेष पिज्जाको समेत महत्वपूर्ण भूमिका रहेको छ । यसमा पाँच प्रकारका इटालियन चीज र घरमै तयार गरिएको टमाटरको जाम प्रयोग गरिन्छ । पासकेरेल्लाले स्वाद र सामग्रीको गुणस्तरमा सम्झौता नहोस् भनेर आफ्नो व्यवसायलाई ठूलो चेनमा विस्तार गर्ने केही व्यावसायिक प्रस्तावसमेत अस्वीकार गरेका छन् । एभरेष्ट न्यूज एजेन्सी

धनुषा । धनुषाको क्षिरेश्वरनाथ नगरपालिका–२ (साविक रमदैया भवाडी गा.वि.स वडा नं १,५ र ९) का २४२ परिवारले नापजाँच सम्पन्न भएको करिब ९ वर्षपछि जग्गाधनी प्रमाण पुर्जा (लालपुर्जा) प्राप्त गरेका छन्।

लामो समयदेखि स्ववासीका रूपमा बसोबास गर्दै आएका स्थानीय २४२ परिवारले अब आफ्नो जग्गामाथिको कानुनी स्वामित्व औपचारिक रूपमा प्राप्त गरेका हुन्। नापी कार्यालय धनुषाले आवश्यक प्रक्रिया पूरा गरी उनीहरूलाई जग्गाधनी प्रमाण पुर्जा वितरण गरेको हो।

उक्त क्षेत्रको नापजाँच कार्य २०७४ सालमै सम्पन्न भएको थियो। तर नापनक्सा सम्पन्न भए पनि आवश्यक कानुनी तथा प्रशासनिक प्रक्रिया पूरा हुन नसक्दा लामो समयसम्म जग्गाधनी प्रमाण पुर्जा वितरण हुन सकेको थिएन। लामो समयदेखि रोकिएको प्रक्रिया अघि बढाउँदै अहिले २४२ थान जग्गाधनी प्रमाण पुर्जा वितरण गरिएको हो।

जग्गाधनी प्रमाण पुर्जा प्राप्त भएसँगै स्ववासीका रूपमा बसोबास गर्दै आएका परिवारको जग्गामाथिको स्वामित्व स्थापित भएको छ। स्ववासी जग्गा दर्ता गरी जग्गाधनी प्रमाण पुर्जा वितरण भएपछि स्थानीय बासिन्दाले कानुनी तथा आर्थिक लाभ प्राप्त गर्न सक्नेछन्।

लालपुर्जा प्राप्त भएपछि जग्गा बैंक तथा वित्तीय संस्थामा धितो राखेर ऋण लिन सहज हुनेछ।त्यस्तै, जग्गाको स्वामित्व स्पष्ट भएपछि भूमिसम्बन्धी विवाद निरुपण गर्नसमेत सहज हुनेछ।

यसअघि धनुषाका ४३५४ परिवारले लालपुर्जा पाएका छन् । एभरेष्ट न्यूज एजेन्सी