काठमाडौँ । भेनेजुएलामा आएको विनाशकारी भूकम्पले फुटबल जगतलाई पनि ठूलो क्षति पुगेको छ । भूकम्पमा परेर राष्ट्रिय टोलीका उदाउँदा खेलाडीसहित केही युवा फुटबलरको ज्यान गएको छ भने अन्य खेलाडीका परिवार पनि प्रभावित भएका छन् ।

भेनेजुएलाको राष्ट्रिय टोली र भेनेजुएला फुटबल महासंघका अनुसार १८ वर्षीय युवा खेलाडी यिमभेर्ट बेरोतेरानको भूकम्पमा मृत्यु भएको छ । उनले केही महिनाअघि दोहामा सम्पन्न १७ वर्षमुनिको विश्वकपमा भेनेजुएलाको प्रतिनिधित्व गरेका थिए भने हालै २० वर्षमुनिको राष्ट्रिय टोलीबाट पनि खेलेका थिए ।

यस्तै, युवा फुटबलर भिक्टर पालासियोस र रजान सिजाको पनि भूकम्पमा ज्यान गएको उनीहरूका क्लब र फुटबल महासंघले पुष्टि गरेका छन् ।

यसैबीच, जुलिया फुटबल क्लबका रक्षक हेक्टर बेलोले सामाजिक सञ्जालमार्फत भूकम्पका क्रममा आफ्नी जीवनसाथीको मृत्यु भएको जानकारी दिएका छन् । उनका अनुसार श्रीमतीले भूकम्पका बेला सानो छोरीलाई जोगाउने प्रयास गर्दा ज्यान गुमाएकी हुन् । बेलोकी छोरी र उनकी फुपू भने घाइते अवस्थामा अस्पतालमा उपचाररत रहेका छन् ।एभरेष्ट न्यूज एजेन्सी

काठमाडौँ । जारी फिफा फुटबल विश्वकप अन्तर्गत समूह ‘जी’ का अन्तिम खेल आज बिहान हुदैछन् । नेपाली समय अनुसार बिहान ८: ४५ बजेदेखि शुरु हुने खेलमा बेल्जियमले न्युजिल्यान्डसँग प्रतिस्पर्धा गर्दैछ भने सोही समयमा इजिप्ट र इरान आमनेसामने हुनेछन् ।

अन्तिम खेलअघि समूहको अवस्था निकै रोमाञ्चक बनेको छ । इजिप्ट, इरान र बेल्जियम तीनै टोलीसँग समूह विजेता बन्ने सम्भावना कायम छ ।

इजिप्ट चार अंकसहित शीर्ष स्थानमा छ भने इरान पनि चार अंकका साथ दोस्रो स्थानमा रहेको छ । त्यस्तै बेल्जियम दुई बराबरीबाट दुई अंक जोडेर तेस्रो स्थानमा छ भने न्युजिल्यान्ड एक अंकसहित पुछारमा छ ।

बेल्जियमले नकआउट चरण पुग्न न्युजिल्यान्डलाई हराउनै पर्ने अवस्था छ । जित निकाले शीर्ष दुईमा स्थान निश्चित हुनेछ । यद्यपि समूह विजेता बन्न इजिप्टले इरानसँग जित निकाल्न नहुने र आफूले राम्रो गोलअन्तरका साथ जित निकाल्नुपर्ने सम्भावना पनि छ ।

रुडी गार्सियाको टोलीले पहिलो खेलमा इजिप्टसँग १-१ को बराबरी खेलेको थियो भने दोस्रो खेलमा १० खेलाडीमा सीमित रहँदा पनि इरानसँग गोलरहित बराबरी खेलेको थियो । बेल्जियमले पछिल्ला दुई विश्वकपका पाँच खेलमा जम्मा दुई गोल मात्र गरेको छ । तीमध्ये एक गोल विपक्षीको आत्मघाती थियो ।  यद्यपि बेल्जियम लगातार १५ खेलसम्म अपराजित रहेको छ । यो टोलीका लागि सकारात्मक पक्ष हो। अनुभवी गोलरक्षक थिबाउट कोर्टुवाले यो खेल खेले विश्वकपमा बेल्जियमका लागि सबैभन्दा धेरै १८ खेल खेल्ने कीर्तिमान बनाउनेछन् ।

न्युजिल्यान्डले पहिलो दुई खेलबाट एक अंक मात्र जोडेको छ । दोस्रो खेलमा इजिप्टविरुद्ध अग्रता लिए पनि अन्ततः ३-१ ले पराजित भएको थियो । विश्वकप इतिहासमा न्युजिल्यान्डले आठ खेल खेल्दा जित निकाल्न सकेको छैन । चार बराबरी र चार हार बेहोरेको टोली यसपटक पहिलो विश्वकप जितको खोजीमा हुनेछ । विश्वकपका आठमध्ये पाँच खेलमा न्युजिल्यान्डले कम्तीमा दुई गोल खाएको छ। रक्षात्मक कमजोरी सुधार्न सके मात्र बेल्जियमलाई चुनौती दिन सक्ने देखिन्छ ।

यी दुई टोलीबीच कुनै पनि प्रतियोगितामा यसअघि भेट भएको छैन । यद्यपि न्युजिल्यान्डले विश्वकपमा युरोपेली टोलीविरुद्ध खेलेका पछिल्ला दुई खेल बराबरीमा टुङ्ग्याएको थियो । सन् २०१० मा उसले स्लोभाकिया र इटालीसँग समान १–१ को नतिजा निकालेको थियो ।

समूहको अर्को खेलमा इजिप्ट र इरानबीचको भिडन्तले शीर्ष स्थानको टुङ्गो लगाउनेछ । इजिप्टले जित निकाले समूह विजेता बन्नेछ । बराबरीले पनि बेल्जियमले न्युजिल्यान्डलाई हराउन नसके वा गोलअन्तरमा इजिप्टलाई उछिन्न नसके शीर्ष स्थान सुरक्षित रहनेछ । इरानले समूह विजेता बन्न इजिप्टलाई हराउनुपर्नेछ। साथै बेल्जियमले जित निकाल्न नसक्ने वा गोलअन्तरमा इरानभन्दा अघि नबढ्ने अवस्था आवश्यक हुनेछ । समूह विजेता बन्ने टोलीले अन्तिम ३२ को चरणमा तेस्रो स्थानमा रहने टोलीसँग खेल्ने भएकाले शीर्ष स्थानलाई विशेष महत्वका रूपमा हेरिएको छ ।

इजिप्टले दोस्रो खेलमा न्युजिल्यान्डलाई ३-१ ले हराउँदै विश्वकप इतिहासकै पहिलो जित दर्ता गरेको थियो । यसैबीच मोहम्मद सलाह टोलीका सबैभन्दा प्रभावशाली खेलाडी बनेका छन् । उनले विश्वकपमा खेलेका चारै खेलमा गोल वा गोलका लागि सहयोग गरेका छन् । यदि उनले इरानविरुद्ध गोल गरे राष्ट्रिय टोलीका सर्वाधिक गोलकर्ता बन्नेछन् ।

इरानले पहिलो दुई खेल बराबरी खेले पनि खेल प्रदर्शनका आधारमा समूहका चार टोलीमध्ये सबैभन्दा कमजोर देखिएको छ । टोलीले सबैभन्दा कम प्रहार गरेको छ भने सबैभन्दा धेरै प्रहार पनि व्यहोरेको छ । विश्वकपका २० खेलमध्ये इरानले तीन खेल मात्र जितेको छ । टोलीले अहिलेसम्म विश्वकपको पहिलो चरण कहिल्यै पार गर्न सकेको छैन । बेल्जियमविरुद्धको खेलमा इरानले विश्वकप इतिहासकै सबैभन्दा बढी उमेरको सुरुआती टोली मैदानमा उतारेको थियो । औसत उमेर ३२ वर्षभन्दा बढी रहेको टोलीमा ३६ वर्ष वा सोभन्दा माथिका तीन खेलाडी सुरुदेखि मैदानमा थिए । इजिप्ट र इरानबीच विश्वकपमा पहिलो पटक भेट हुन लागेको हो । यसअघि सन् २००० मा भएको एक मैत्रीपूर्ण प्रतियोगितामा दुवैले १-१ को बराबरी खेलेका थिए। त्यसपछि पेनाल्टी सुटआउटमा इजिप्ट विजयी भएको थियो ।

समूह ‘जी’ को सम्भावित अवस्था हेर्दा इजिप्टले जिते निश्चित रूपमा समूह विजेता बन्ने छ भने बराबरीले पनि शीर्ष स्थान सुरक्षित रहने सम्भावना छ ।

त्यस्तै इरानले जिते र बेल्जियमले अनुकूल नतिजा निकाल्न नसके समूह विजेता बन्ने छ भने बेल्जियमले नकआउट पुग्न जित अनिवार्य छ । शीर्ष स्थानका लागि इजिप्टले नजित्ने र आफूले ठूलो अन्तरको जित निकाल्नुपर्ने अवस्था छ ।

त्यस्तै न्युजिल्यान्ड नकआउट पुग्ने सम्भावना अत्यन्त न्यून भए पनि पहिलो विश्वकप जितका लागि मैदानमा उत्रने छ ।एभरेष्ट न्यूज एजेन्सी

काठमाडौँ । भेनेजुएलामा गएको शक्तिशाली भूकम्पमा परी ज्यान गुमाउनेको संख्या ९२० पुगेको छ ।

राष्ट्रिय सभाका अध्यक्ष होर्खे रोड्रिगेजले दिएको जानकारीअनुसार ३ हजार ३६० जना घाइते भएका छन् भने १७२ जना अझै पनि भत्किएका भवनको भग्नावशेषमा फसिरहेका छन् । भूकम्पबाट हालसम्म ३८३ भवन, १३ अस्पताल, २५ वटा किनमेल केन्द्र र १ हजार २ अन्य संरचनामा क्षति पुगेको सरकारी तथ्यांकमा उल्लेख छ । सबैभन्दा बढी प्रभावित ला गुआइरा क्षेत्रमा सेना परिचालन गरिएकाले त्यहाँ अनावश्यक यात्रा नगर्न सरकारको आग्रह छ ।

रोड्रिगेजले घाइतेको उद्धार र उपचारका लागि प्रयोग भइरहेका सडकमा अत्यधिक भीड बढेकाले सर्वसाधारणलाई सडक खाली राखेर उद्धार टोलीलाई सहयोग गर्न अपिल गरेका छन् ।

उद्धार तथा राहत कार्यलाई तीव्र बनाउन मेक्सिको, अमेरिका, एल साल्भाडोर, स्विट्जरल्यान्ड, कोलम्बियालगायत विभिन्न देशबाट ८६१ अन्तर्राष्ट्रिय स्वयंसेवक भेनेजुएला पुगेका छन् । आगामी दिनमा थप उद्धारकर्मी पनि आउने अपेक्षा गरिएको छ ।

संयुक्त राष्ट्रसंघका अनुसार विश्वका विभिन्न देशबाट करिब १ हजार आपत्कालीन उद्धारकर्मी २५ वटा खोज तथा उद्धार टोलीमार्फत प्रभावित क्षेत्रमा परिचालन भइरहेका छन् । मुख्य राजमार्गबाट सेना, उद्धार टोली, डम्प ट्रक र भारी उपकरण प्रभावित क्षेत्रमा निरन्तर पठाइँदै छ।

सरकारले सबै आपत्कालीन सेवा सबैभन्दा बढी प्रभावित ला गुआइरा क्षेत्रमा केन्द्रित गरेको जनाएको छ । ताचिरा राज्यबाट ४५ जना अग्निनियन्त्रक, एउटा तालिमप्राप्त खोजी कुकुर तथा आवश्यक उद्धार उपकरणसहितको टोली पनि परिचालन गरिएको छ ।

यसैबीच, अमेरिकी वित्त मन्त्रालयले राहत सामग्री र आर्थिक सहयोग सहज बनाउन केही प्रतिबन्धमा अस्थायी छुट दिएको छ । यद्यपि प्रभावित क्षेत्रमा ठूलो परिमाणमा रहेको भग्नावशेष र सीमित स्रोतसाधनका कारण उद्धार कार्य अझै चुनौतीपूर्ण बनेको अधिकारीहरूले बताएका छन् ।एभरेष्ट न्यूज एजेन्सी

काठमाडौँ । जल तथा मौसम विज्ञान विभागले हाल कोशी, मधेश र बागमती प्रदेशका सम्पुर्ण भू-भाग, गण्डकी प्रदेशको केही भू-भाग, लुम्बिनी प्रदेशको पूर्वी भू-भागको थोरै स्थानमा मनसुनी वायूको प्रभाव रहेको छ र अन्य भू-भागमा पश्चिमी वायू र स्थानीय वायूको आंशिक प्रभाव रहेको जानकारी दिएको छ । साथै गण्डकी र लुम्बिनी प्रदेशको बाँकी भू-भाग, तथा कर्णाली र सुदुरपश्चिम प्रदेशका सम्पूर्ण भू-भागमा ४-५ दिनमा मनसुन बिस्तार हुने सम्भावना रहेको विभागले जनाएको छ ।

हाल देशको हिमाली र पहाडी भू-भागमा साधारणतया बादल लागेको छ र तराईमा आंशिक बादल लागेको छ । कर्णाली र सुदूरपश्चिम प्रदेशका हिमाली र पहाडी भू-भागमा आंशिक बादल लागेको छ, तराईमा मौसम मूख्यतया सफा रहेको छ । कोशी, बागमती र गण्डकी प्रदेशका एक-दुई स्थानमा मेघगर्जन/चट्याङ्ग सहित हल्का वर्षा भईरहेको छ ।

आज दिउँसो देशका हिमाली र पहाडी भू-भाग साथै मधेश प्रदेश र कोशी प्रदेशका तराई भू-भागमा साधारणतया बादल लाग्नेछ । बागमती, गण्डकी, लुम्बिनी प्रदेशको तराई भू-भागमा आंशिक बादल लाग्नेछ । सुदूरपश्चिम प्रदेशको तराई भू-भागमा मौसम मूख्यतया सफा रहनेछ ।  कोशी, बागमती र गण्डकी प्रदेशका हिमाली र पहाडी भू-भागका केही स्थानमा, लुम्बिनी, कर्णाली र सुदूरपश्चिम प्रदेशको हिमाली र पहाडी भू-भागका थोरै स्थानमा मध्यमसम्मको वर्षा/हिमपातको सम्भावना छ। कोशी प्रदेशका तराई भू-भाग तथा मधेश प्रदेशका थोरै स्थानमा, बागमती, गण्डकी र लुम्बिनी प्रदेशको तराईका एक-दुई स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ । लुम्बिनी र सुदूरपश्चिम प्रदेशका तराई भू-भागका थोरै स्थानहरूमा तातो लहर हुने सम्भावना छ ।

त्यस्तै आज राति कोशी, मधेश, बागमती र गण्डकी प्रदेशमा साधारणतया बादल लाग्नेछ, लुम्बिनी, कर्णाली र सुदूरपश्चिम प्रदेशमा आंशिक बादल लाग्नेछ । कोशी, बागमती र गण्डकी प्रदेशको हिमाली र पहाडी भू-भागका केही स्थानमा तथा लुम्बिनी, कर्णाली र सुदूरपश्चिम प्रदेशको हिमाली र पहाडी भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ । कोशी प्रदेशका तराई भू-भाग तथा मधेश प्रदेशको केही स्थानमा,  बागमती र गण्डकी प्रदेशका तराईका थोरै स्थानमा, लुम्बिनी र सुदूरपश्चिम प्रदेशका तराई भू-भागका एक-दुई स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ । कोशी प्रदेशका पहाडी र तराई भू-भागका एक-दुई स्थानमा भारी वर्षाको समेत सम्भावना रहेको छ ।एभरेष्ट न्यूज एजेन्सी

आजको राशिफल बिस २०८३ असार १३ गते शनिबार ईस २०२६ जुन २७ नेपाल सम्बत ११४६ तछलाथ्व त्रयोदशी, रौद्र नाम संवत्सर सूर्य उत्तरायण, गृष्म ऋतु, जेठ शुक्ल त्रयोदशी, चन्द्रमा वृश्चिक राशिमा, अनुराधा नक्षत्र, साध्य योग, तैतिल करण । आज नेपालमा सुर्योदय बिहान ५ बजेर १२ मिनेटमा र सूर्यास्त साँझ ७ बजेर २ मिनेटमा हुनेछ । आज जन्म लिने बच्चा वृश्चिक राशीको हुनेछ ।

मेष (चु, चे, चो, ला, लि, लु, ले, लो, अ) –

आज नयाँ सोच र उत्साहका साथ दिनको सुरुवात हुनेछ। विगतदेखि रोकिएका कामले गति लिन सक्छन् र मेहनतअनुसारको प्रतिफल प्राप्त हुने सम्भावना छ। कार्यक्षेत्रमा तपाईंको सक्रियता र आत्मविश्वासले राम्रो छाप छोड्नेछ। सहकर्मी वा वरिष्ठ व्यक्तिबाट सहयोग प्राप्त हुन सक्छ। आर्थिक पक्षमा सामान्य सुधार देखिए पनि अनावश्यक खर्चमा नियन्त्रण गर्नु आवश्यक हुनेछ। परिवारका सदस्यहरूसँग रमाइलो समय बित्नेछ र घरमा सकारात्मक वातावरण रहनेछ। स्वास्थ्य सामान्य रहनेछ, तर पर्याप्त आराम र सन्तुलित भोजनमा ध्यान दिनु उचित हुनेछ।

वृष (इ, उ, ए, ओ, वा, वि, वु, वे, वो) –

आज धैर्य, संयम र व्यवहारिक सोचले तपाईंलाई सही दिशामा अघि बढाउनेछ। काममा केही ढिलाइ भए पनि अन्ततः सफलता हात पर्ने सम्भावना छ। आर्थिक पक्ष स्थिर रहनेछ र बचत गर्ने अवसर मिल्न सक्छ। परिवारका सदस्यहरूसँग खुला संवाद हुँदा सम्बन्ध अझ प्रगाढ बन्नेछ। पुराना साथी वा आफन्तसँग भेटघाटले मन प्रसन्न बनाउनेछ। स्वास्थ्य सामान्य रहनेछ, तर नियमित दिनचर्या अपनाउनु लाभदायक हुनेछ।

मिथुन (का, कि, कु, घ, ङ, छ, के, को, ह) –

आज व्यस्तता बढे पनि त्यसको प्रतिफल सन्तोषजनक रहनेछ। नयाँ योजना बनाउने वा पुराना कामलाई नयाँ ढंगले अघि बढाउने अवसर मिल्न सक्छ। कार्यक्षेत्रमा सहकर्मीको सहयोग प्राप्त हुनेछ। आर्थिक रूपमा आम्दानीका केही नयाँ सम्भावना देखिन सक्छन्। परिवारमा रमाइलो वातावरण रहनेछ र प्रियजनसँग बिताएको समय सुखद हुनेछ। अध्ययन तथा बौद्धिक कार्यमा संलग्न व्यक्तिहरूका लागि दिन फलदायी रहनेछ।

कर्कट (हि, हु, हे, हो, डा, डि, डु, डे, डो) –

आज घरपरिवारसँग सम्बन्धित विषयले प्राथमिकता पाउनेछ। परिवारका सदस्यहरूसँगको सहयोग र विश्वासले मनलाई सन्तुष्टि दिनेछ। कार्यक्षेत्रमा जिम्मेवारी बढ्न सक्छ, तर तपाईंको लगनशीलताले सबै काम सहज रूपमा सम्पन्न हुनेछ। आर्थिक पक्षमा सामान्य सुधार देखिनेछ। मानसिक रूपमा शान्ति र सन्तुलन कायम रहनेछ। कुनै शुभ समाचारले दिनलाई अझ खुसीमय बनाउन सक्छ।

सिंह (मा, मि, मु, मे, मो, टा, टि, टु, टे) –

आज आफ्नो क्षमता देखाउने राम्रो अवसर प्राप्त हुनेछ। नेतृत्वदायी भूमिकामा सफलता मिल्ने सम्भावना छ। कार्यक्षेत्रमा तपाईंको सुझाव र निर्णयलाई महत्व दिइनेछ। आर्थिक रूपमा लाभदायक अवसर प्राप्त हुन सक्छ, तर ठूलो लगानी गर्दा सोचविचार गर्नु राम्रो हुनेछ। सामाजिक क्षेत्रमा सम्मान र प्रतिष्ठा बढ्ने संकेत छन्। परिवारको साथले आत्मविश्वास थप बलियो बनाउनेछ।

कन्या (टो, प, पि, पु, ष, ण, ठ, पे, पो) –

आज ज्ञान, अध्ययन र नयाँ सीप सिक्ने अवसर प्राप्त हुन सक्छ। कुनै पुरानो योजना पुनः सुरु गर्ने वातावरण बन्नेछ। कार्यक्षेत्रमा धैर्य र निरन्तरताले राम्रो परिणाम दिनेछ। आर्थिक अवस्था सामान्य रहनेछ, तर खर्चमा नियन्त्रण राख्नुपर्ने देखिन्छ। परिवारमा खुसीको वातावरण रहनेछ। स्वास्थ्य राम्रो रहनेछ, तर पर्याप्त पानी पिउन र आराम गर्न नबिर्सनुहोस्।

तुला (रा, रि, रु, रे, रो, ता, ति, तु, ते) –

आज आर्थिक गतिविधिमा सकारात्मक परिवर्तन आउने संकेत छन्। रोकिएको रकम प्राप्त हुने वा आम्दानीको नयाँ स्रोत फेला पर्ने सम्भावना छ। कार्यक्षेत्रमा सहकार्य र समन्वय राम्रो रहनेछ। परिवारमा खुसीको वातावरण बन्नेछ र प्रियजनसँगको सम्बन्ध अझ प्रगाढ हुनेछ। सामाजिक क्षेत्रमा सक्रियता बढ्नेछ। नयाँ योजना वा लगानीबारे सोच्ने उपयुक्त समय बन्न सक्छ।

वृश्चिक (तो, ना, नि, नु, ने, नो, या, यि, यु) –

आज तपाईंको मेहनत र लगनशीलताले राम्रो परिणाम दिलाउनेछ। प्रतिस्पर्धात्मक क्षेत्रमा सफलता मिल्ने सम्भावना छ। कार्यक्षेत्रमा नयाँ अवसर प्राप्त हुन सक्छ। आर्थिक रूपमा लाभका संकेत देखिए पनि हतारमा निर्णय नगर्नु उचित हुनेछ। परिवारमा खुसीको खबर आउन सक्छ। सम्बन्धमा विश्वास र समझदारी बढ्नेछ। मानसिक रूपमा उत्साह र आत्मविश्वास बढ्नेछ।

धनु (ये, यो, भ, भि, भु, ध, फा, ढ, भे) –

आज उत्साह, उमंग र सकारात्मक सोचले दिनभर साथ दिनेछ। नयाँ योजना सुरु गर्न वा पुराना कामलाई गति दिन अनुकूल समय छ। यात्रा, व्यापार वा अध्ययनसँग सम्बन्धित काममा लाभ मिल्न सक्छ। सामाजिक क्षेत्रमा मान–सम्मान बढ्ने सम्भावना छ। आर्थिक पक्षमा सुधारका संकेत देखिनेछन्। परिवारसँगको सम्बन्ध थप सुमधुर बन्नेछ र घरमा खुसीको वातावरण रहनेछ।

मकर (भो, ज, जि, खि, खु, खे, खो, गा, गि) –

आज जिम्मेवारी बढे पनि धैर्य र अनुशासनले सबै काम सफलतापूर्वक सम्पन्न हुनेछन्। कार्यक्षेत्रमा मेहनतको उचित मूल्यांकन हुन सक्छ। आर्थिक रूपमा खर्चमा नियन्त्रण गर्नु आवश्यक हुनेछ। परिवारको साथ र सुझावले कठिन निर्णय लिन सजिलो हुनेछ। स्वास्थ्यमा सामान्य थकान महसुस हुन सक्छ, त्यसैले विश्रामका लागि समय निकाल्नु उपयुक्त हुनेछ। दिनको अन्त्यमा सन्तोषजनक उपलब्धि प्राप्त हुन सक्छ।

कुम्भ (गु, गे, गो, सा, सि, सु, से, सो, द) –

आज सिर्जनात्मक सोच र नयाँ विचारले तपाईंलाई विशेष अवसर दिलाउन सक्छ। कार्यक्षेत्रमा प्रगति हुनेछ र रोकिएका योजनाहरू अघि बढ्नेछन्। साथीभाइ तथा सहकर्मीको सहयोगले आत्मविश्वास बढ्नेछ। आर्थिक रूपमा सुधार आउने सम्भावना छ। परिवारमा समझदारी र खुसी कायम रहनेछ। सामाजिक सम्बन्ध विस्तार हुने र नयाँ व्यक्तिसँग परिचय हुने सम्भावना पनि देखिन्छ।

मीन (दि, दु, थ, झ, ञ, दे, दो, च, ची) –

आज धैर्य, संयम र सकारात्मक सोच आवश्यक पर्ने दिन हो। केही काम अपेक्षाभन्दा ढिलो सम्पन्न हुन सक्छन्, तर निरन्तर प्रयासले राम्रो नतिजा दिनेछ। आर्थिक रूपमा सोचविचार गरेर खर्च गर्नु उचित हुनेछ। परिवारका सदस्यहरूको साथ र सहयोगले मानसिक बल मिल्नेछ। पुराना अधुरा काम पूरा गर्ने अवसर प्राप्त हुन सक्छ। दिनको उत्तरार्धमा सुखद समाचार प्राप्त हुने वा मन खुसी बनाउने घटना घट्न सक्ने सम्भावना छ ।एभरेष्ट न्यूज एजेन्सी