काठमाडौं, १० चैत ।
आम जनता पार्टी (आजपा) ले प्रदेश कमिटीको जिम्मेवारी हेरफेर गरेको छ । आजपा प्रदेश कमिटीको इन्चार्ज, सहइन्चार्ज, अध्यक्ष, प्रवक्ता, कार्यालय सचिव लगायतका जिम्मेवारीमा हेरफेर गरेको छ ।
आजपा संगठन विभाग प्रमुख त्रिभुवन साहका अनुसार जिम्मेवारी हेरफेर गर्दै पार्टीलाई थप सशक्त बनाउने र पार्टीद्धारा जारी आन्दोलनका कार्यक्रमलाई व्यवस्थित रुपमा अगाडी बढाउने निर्णय भएको छ ।
सात प्रदेश सहित उपत्यका विशेष प्रदेश कमिटीको इन्चार्ज, सहइन्चार्जका साथै पार्टीको प्रवक्ता, कार्यालय सचिव लगायतका जिम्मेवारी तोकिएको उनले जनाएका छन् । कोशी प्रदेशको इन्चार्जमा तिलक थापामगर, सहइन्चार्जमा जुरीलाल मोची, मधेश प्रदेशको इन्चार्जमा त्रिभुवन साह (अमर), अध्यक्षमा उमेश कुशवाहा, बागमती प्रदेशको इन्चार्जमा धनकुमारी मगर र अध्यक्षमा पासाङ तामाङलाई जिम्मेवारी तोकिएको छ ।
यसैगरी, उपत्यका विशेष प्रदेश कमिटीको इन्चार्जमा देवी पण्डित रेग्मी, अध्यक्षमा बिजय यादव, गण्डकी प्रदेश कमिटीको इन्चार्जमा तिलक थापामगर, सहइन्चार्जमा भोजराज त्रिपाठी, अध्यक्षमा चेतबहादुर कुमाल, लुम्बिनी प्रदेशको इन्चार्जमा राधेश्याम गुप्ता, सहइन्चार्जमा विद्या शर्मा, अध्यक्षमा शालिग्राम पाठक, कर्णाली प्रदेशको इन्चार्जमा विद्याप्रसाद शर्मा, अध्यक्षमा राम विष्ट र सुदुरपश्चिम प्रदेशको इन्चार्जमा विक्रम बहादुर बम र अध्यक्षमा विष्णु सिंह बोहरा रहेका छन् ।
आजपाले पार्टीको केन्द्रिय प्रवक्तामा तिलक थापामगर, चन्द्रभुषण साह र सुभाष साहलाई जिम्मेवारी तोकेको छ । यस्तै कार्यालय सचिवमा रबिन्द्र सिंह, रञ्जुकुमारी साह र बालकृष्ण सापकोटालाई जिम्मेवारी तोकिएको आजपा संगठन विभाग प्रमुख साहले जनाएका छन् ।
आजपा अध्यक्ष एवं पूर्वमन्त्री प्रभु साहको अध्यक्षतामा ७ चैतमा काठमाडौंको कमलादी स्थित नेपाल प्रज्ञा प्रतिष्ठानमा बसेको केन्द्रीय कमिटीको बैठकले केन्द्रीय कमिटीलाई पुर्नगठनका साथै नेताहरुको जिम्मेवारी बाँडफाँड गरेको हो ।
१३ सदस्यीय केन्द्रीय कार्यालय, ९१ सदस्यीय केन्द्रीय सचिवालय २५७ सदस्यीय केन्द्रीय सदस्य र बैकल्पिक सदस्य सहित ३३७ सदस्यीय केन्द्रीय कमिटी पुर्नगठन गरिएको छ ।
आरके श्रीवास्तव, रौतहट, चैत १० गते ।
विश्व क्षयरोग दिवस (World TB Day) को अवसरमा आज फतुवा विजयपुर नगरपालिका तथा कटहरिया नगरपालिकामा विभिन्न जनचेतनामूलक कार्यक्रमहरू सम्पन्न भएका छन् । “हो! हामी क्षयरोग अन्त्य गर्छौं, राष्ट्रिय अभियान हाम्रो योगदान” भन्ने नाराका साथ कार्यक्रमहरू आयोजना गरिएको हो ।
फतुवा विजयपुर नगरपालिका स्वास्थ्य शाखाको आयोजनामा सम्पन्न कार्यक्रममा स्वास्थ्य शाखा प्रमुख प्रमोद प्रसाद गुप्ताले क्षयरोग (टीबी) सम्बन्धी विस्तृत जानकारी दिँदै रोगबाट बच्ने उपायहरूबारे स्पष्ट पार्नुभयो । उहाँले समयमै पहिचान, नियमित औषधि सेवन तथा जनचेतनाको अभाव हटाउन सके क्षयरोग नियन्त्रण सम्भव रहेको बताउनुभएको छ ।
कार्यक्रममा स्वास्थ्य सह-संयोजक रमेश प्रसाद यादवले “राष्ट्रिय अभियान, हाम्रो योगदान” भन्ने नारालाई आत्मसात गर्दै क्षयरोग अन्त्यका लागि सबै नागरिकले जिम्मेवार भूमिका निर्वाह गर्नुपर्ने आवश्यकता औंल्याउनुभयो । उहाँले समुदायस्तरमै सचेतना अभिवृद्धि गर्नुपर्नेमा जोड दिनुभयो ।
यसैगरी, विश्व क्षयरोग दिवसकै अवसरमा कटहरिया नगरपालिका स्वास्थ्य शाखाले पनि विशेष कार्यक्रम आयोजना गरी दिवस मनाएको छ । स्वास्थ्य संयोजक दिनेश प्रसाद यादवले नगरपालिकाको प्रांगणमा आयोजित कार्यक्रममा क्षयरोग सम्बन्धी जनचेतनामूलक सन्देशहरू प्रवाह गर्दै रोगको समयमै परीक्षण र उपचारमा जोड दिनुभयो ।
कार्यक्रमहरूमा स्थानीय जनप्रतिनिधि, स्वास्थ्यकर्मी तथा सर्वसाधारणको उल्लेखनीय सहभागिता रहेको थियो । यस्ता कार्यक्रमहरूले क्षयरोग विरुद्धको अभियानलाई थप प्रभावकारी बनाउने विश्वास व्यक्त गरिएको छ । फतुवा विजयपुरमा भएको कार्यक्रममा याेजना शाखा प्रमुख सुधिर यादव,आईटि शाखा प्रमुख हंसराज यादव सहित नगरपालिकाका कर्मचारी सहभागी थिए ।
आरके श्रीवास्तव,राैतहट,१० गते चैत ।
रौतहट । केही दिनयता परेको लगातार वर्षा, असिना र तीव्र हावाहुरीका कारण रौतहटका इँटा उद्योगहरू गम्भीर रूपमा प्रभावित भएका छन् । शुक्रबारदेखि आइतबारसम्मको मौसमीय विपत्तिले जिल्लाका करिब ५० वटा इँटा उद्योगमा ठूलो नोक्सानी पुर्याएको छ ।
रौतहट इँटा उद्योग व्यवसायी संघका अध्यक्ष रामबिनोद साहका अनुसार पोल्नका लागि तयार पारिएका काँचो इँटाहरू नष्ट हुँदा उद्योगीहरू आर्थिक संकटमा परेका छन् । प्रारम्भिक तथ्यांकअनुसार १० लाखभन्दा बढी काँचो इँटा बिग्रिएका छन्, जसको मूल्य करिब ४ करोड रुपैयाँ पुग्ने अनुमान गरिएको छ ।
उद्योगीहरूले खुला ठाउँमा सुकाउन राखिएका काँचो इँटाहरू अचानक आएको मुसलधारे वर्षा र असिनाले पूर्ण रूपमा बिगारेको बताएका छन् । तेज हावाहुरीले थप क्षति पुर्याउँदा उत्पादन नै प्रभावित भएको उनीहरूको भनाइ छ ।
बिके, बिर, पूजा, एमबिआई, सोना, रामजानकी, उदय र आजादलगायतका इँटा उद्योगहरूमा सबैभन्दा बढी असर परेको जनाइएको छ ।
यस प्राकृतिक प्रकोपले ठूलो आर्थिक भार थपिएपछि उद्योगीहरूले सम्बन्धित निकायसँग राहत तथा क्षतिपूर्तिको माग गरेका छन् । साथै, भविष्यमा यस्ता जोखिमबाट बच्न आवश्यक पूर्वतयारी र दीर्घकालीन उपाय अपनाउनुपर्ने आवश्यकता पनि औंल्याइएको छ ।
आरके श्रीवास्तव,रौतहट,१० गते चैत ।
रौतहट — रौतहटको कटहरियामा जनता समाजवादी पार्टी (जसपा) नेपाल, रौतहट क्षेत्र नम्बर ३ को हालै सम्पन्न प्रतिनिधि सभा सदस्य निर्वाचनको समिक्षा बैठक सम्पन्न भएको छ ।
उक्त बैठक जसपा नेपालका तर्फबाट उम्मेदवार रहनु भएका संविधान सभा सदस्य तथा पूर्व मन्त्री गोविन्द चौधरीको प्रमुख आतिथ्यतामा आयोजना गरिएको थियो । कार्यक्रममा निर्वाचन जनपरिचालन समितिका संयोजक रामप्रवेश दासको संयोजन रहेको थियो ।
समिक्षा बैठकमा पार्टीका विभिन्न नेताहरूले आ–आफ्नो वडास्तरको चुनावी गतिविधि र परिणामको समीक्षा प्रस्तुत गरेका थिए । जसअनुसार विजय चौधरी, अनिल यादव, रामअश्रे चौधरी, रामप्रवेश दास लगायतले आफ्नो वडाको अवस्थाबारे धारणा राखेका थिए । उक्त जानकारी जसपा नेपालका नेता राजाबाबु साहले दिएका हुन् ।
कार्यक्रमको अन्त्यमा प्रमुख अतिथि गोविन्द चौधरीले चुनावी परिणामलाई आत्मसात गर्दै अगाडि बढ्नुपर्नेमा जोड दिए । उनले केही कार्यकर्ताबाट कमजोरी भएको स्वीकार गर्दै त्यसलाई सुधार गर्नुपर्ने बताए । साथै, अब इमान्दार र प्रतिबद्ध कार्यकर्ताको बलियो संगठन निर्माण गर्न आवश्यक रहेको उनको भनाइ थियो ।
चौधरीले चुनावको नतिजाबाट निराश नहुन आग्रह गर्दै शून्यबाटै भए पनि नयाँ ऊर्जा र रणनीतिसहित अघि बढ्नुपर्नेमा जोड दिए । कार्यक्रममा सहभागी सम्पूर्ण कार्यकर्तालाई धन्यवाद दिँदै उनले आफूलाई विश्वास गरेर मत दिएका मतदाताप्रति पनि आभार व्यक्त गरे ।
