बारा, २२ माघ ।
२६औं स्थापना दिवसको अवसरमा प्रेस चौतारी नेपाल बाराले सोमबार विभिन्न रचनात्मक कार्यक्रम आयोजना गरेको छ।
स्थापना दिवसको अवसर पारेर प्रेस चौतारी बाराले फरक क्षमता भएका विद्यार्थी अध्ययनरत विद्यालयलाई आर्थिक, शैक्षिक तथा खेलकुद सामग्री र संगठमा आवद्ध दुई संचारकर्मीलाई सहयोग रकम हस्तान्तरण गरेको हो।
प्रेस चौतारी बाराले सिमरास्थित नेपाल अपाङ्ग सेवा संघको भवनमा सञ्चालित सुस्त श्रवण र बौद्धिक अपाङ्गता भएका विद्यार्थी अध्ययनरत विद्यालयलाई शैक्षिक तथा खेलकुद सामाग्री र खाद्यान्नका साथै ४० हजारको चेक हस्तान्तरण गरेको छ। विद्यालयमा अध्ययनरत विद्यार्थीको अध्ययन र हेरचाह गर्ने शिक्षकको सेवासुविधाका लागि उक्त रकम हस्तान्तरण गरिएको बताइएको छ।
प्रेस चौतारी नेपालका केन्द्रीय सदस्य एवम् बारा इन्चार्ज अच्युत पौडेलले उक्त रकम बराबरको चेक उपलब्ध गराएका हुन्। केन्द्रीय सदस्य पौडेल र मधेस प्रदेशसभा सदस्य देवनारायण चौधरीले नेपाल अपाङ्ग सेवा संघ बाराका अध्यक्ष गंगाप्रसाद वाग्लेलाई चेक प्रदान गरेका थिए।
चेक ग्रहण गर्दै संघका अध्यक्ष वाग्लेले चौतारी बाराले शैक्षिक सामाग्री तथा आर्थिक सहयोग गरेकोमा खुशी व्यक्त गरे।न्युजकारखाना
राजविराज, २२ माघ ।
सिरहामा ठगी आरोपमा एक विद्यालयका प्रधानाध्यापक पक्राउ परेका छन्।
चन्द्र नमुना माध्यमिक विद्यालय सिरहाका प्रधानाध्यापक रहेका सिरहा नगरपालिका-७ घर भएका मधुसुदन कर्णलाई सोमबार ठगीको आरोपमा प्रहरीले नियन्त्रणमा लिएको हो।
सिरहा नगरपालिका–८ का रोशनकुमार यादवले सञ्चालन गरेको नेपाल आइरन स्टोर एन्ड जनरल सप्लायर्सबाट विद्यालयमा निर्माण कार्यका लागि भन्दै १७ लाख ४ हजार ५ सय ८१ रुपैयाँ ४ पैसाबराबरको निर्माण सामग्री लिएको तर पैसा नदिएर ठगी गरेको आरोपमा उनी पक्राउ परेका हुन्।
सिरहा जिल्ला अदालतबाट ७ दिनको म्याद थप भई थप अनुसन्धान भइरहेको प्रहरीले जनाएको छ।न्युजकारखाना
रौतहट, २२ माघ ।
रौतहटमा गर्भपतन गर्न नमान्दा एक महिलालाई कुटपिट गरी घरबाट निकालिएको छ।
प्रेम बिबाह गरेकी स्थानीय परोहा नगरपालिका-७ नरकटिया टोलकी ३० वर्षीय महिलालाई पति, सासु, ससुरा, जेठान, देवर र नन्दले माइतीबाट सुसरालमा जाँदा कुटपिट गरी घरमा प्रवेश गर्नबाट रोकेका हुन्।
२०७७ सालमा स्थानीय आलोक पटेलसँग प्रेम बिबाह गरेर घर भन्दा बाहिर बस्दै आएकी ३० वर्षीय किरण देवी तेस्रो पटक गर्भवती भएपछि लोग्नेले गर्भ पतन गरेमात्र बिबाह दर्ता प्रमाण पत्र, नेपाली नागरिकता प्रमाण पत्र बनाई दिने भनेको र घरमा जाँदा कुटपिट गरेको पीडित महिलाको गुनासो छ। सन्चारकर्मीसँग कुरा गर्दै पीडितले दुई पटक गर्भ पतन गरिसकेको र तेस्रो पटक २ महिनाको गर्भ रहेको बताउँदै कानुनी रूपमा पत्नी बनाउन गर्भपतन गर्नु पर्ने अडान श्रीमान्को रहेको दुखेसो गरिन्।
गएको शुक्रबार घरमा जाँदा लोग्ने आलोक पटेल, ससुरा हरिन्दर पटेल, सासु कौशल्या देवी, जेठान राजु पटेल, सन्तोष पटेल, देवर छोटेलाल पटेल, नन्द पिंकी पटेल र रागनी कुमारी पटेलले सामूहिक रूपमा कुटपिट गरेको भिडियो आफूसँग रहेको दाबीसमेत गरेकी छन्।
प्रेम बिबाह गरेका लोग्ने आलोक पटेलले आफूसँग पटक-पटक १५ लाख रुपैयाँ व्याग उद्योग, घर निर्माण र झगडा मिलापत्रको लागि लगेको उनको दाबी छ।
आफूमाथि अन्याय भएको भन्दै महिलाले कारबाहीका लागि जिल्ला प्रहरी कार्यालय रौतहटको महिला बालबालिका तथा जेष्ठ नागरिक सेवा केन्द्रमा उजुरी दिएकी छन्।न्युजकारखाना
काठमाडौं, २२ माघ ।
राष्ट्रिय योजना आयोगका नवनियुक्त सदस्य उमाशंकर प्रसादले पद तथा गोपनीयताको शपथ लिएका छन्।
सोमबार राष्ट्रिय योजना आयोगका उपाध्यक्ष मीनबहादुर श्रेष्ठसमक्ष सदस्य उमाशंकरले पद तथा गोपनीयताको शपथ लिएका हुन्। उनलाई माघ १८ गते बसेको मन्त्रिपरिषद् बैठकले सदस्यमा नियुक्त गर्ने निर्णय गरेको थियो।
नवनियुक्त सदस्य उमाशंकरको शपथसँगै आयोगले पूर्णता पाएको छ। रौतहट स्थायी घर भएका उमाशंकरले अर्थशास्त्रमा विद्यावारिधि गरेका छन्। न्युजकारखाना
काठमाडौं, २२ माघ –
राष्ट्रिय स्वतन्त्र पार्टीका सभापति रवि लामिछानेविरूद्ध जिल्ला प्रहरी कार्यालय कास्कीमा ठगी मुद्दाको जाहेरी परेको छ।
लामिछानेसहित १८ जना व्यक्ति/कम्पनीविरूद्ध सूर्यदर्शन बचत तथा ऋण सहकारी संस्थाका पीडितहरूले सोमबार कास्की प्रहरीमा जाहेरी दिएका हुन्।
प्रहरीका अनुसार लामिछानेसहित व्यक्ति र कम्पनीहरूविरूद्ध निवेदन पर्दै आएका थिए। ‘निवेदन यसअघि पनि आएको थियो, आज पुरक जाहेरी परेको हो,’ कास्की प्रहरी प्रवक्ता प्रहरी नायब उपरीक्षक श्रवणकुमार विकले भने, ‘जाहेरी परेपछि अनुसन्धान गर्ने प्रक्रिया सुरू भएको छ।’
सूर्यदर्शन सहकारीका पीडितले यसअघि नै प्रहरीमा ठगी मुद्दामा जाहेरी दिएका थिए। अब त्यसमा थप अनुसन्धान थालिने विकले बताए।
लामिछानेसहित व्यक्ति र संस्थाविरूद्ध के कति मात्रामा रकम ठगी गरेको भन्नेबारे प्रहरीले खुलाएको छैन।
सूर्यदर्शन सहकारीका सञ्चालक गितेन्द्रबाबु राई हुन्। उनी लामिछानेका व्यावसायिक साझेदार हुन्। लामिछानेले उक्त सहकारीबाट रकम लिएको खुलेको थियो।
यसअघि सूर्यदर्शन सहकारीका सञ्चालक राईसहित १९ जनाविरूद्ध १ हजार ३५ जना बचतकर्ताहरूले ठगीमा जाहेरी दिएका थिए।
राईसहितका व्यक्तिसँग १ अर्ब ११ करोड ३४ लाख ४३ हजार ४५.१७ रुपैयाँ बिगो माग गरी जिल्ला अदालतमा ठगी मुद्दा दायर भइसकेको थियो।
सरकारी वकिल कार्यालयले राईसहित १९ जना प्रतिवादीसँग बिगोसँगै ८ देखि १० वर्षसम्म जेल सजायको माग दाबी लिएको थियो। उक्त मुद्दामा कोषाध्यक्ष कुमार रम्तेल, एक उपाध्यक्ष र दुई सदस्यलाई प्रहरीले पक्राउ गरिसकेको छ।न्युजकारखाना
रौतहट, २२ माघ ।
प्रेस चौतारी नेपालको २६औं स्थापना दिवसको अवसरमा प्रेस चौतारी रौतहटले विविध कार्यक्रम गरेर मनाएको छ। सोमबार जिल्ला सदरमुकाम गौरमा रहेको प्रादेशिक अस्पतालमा रहेका बिरामीहरूलाई प्रेस चौतारी नेपालले फलफुल वितरण गरेको थियो।
नेकपा एमालेका केन्द्रीय सदस्य अजय कुमार गुप्ताको प्रमुख आतिथ्यतामा प्रादेशिक अस्पताल गौरमा रहेका बिरामीहरूलाई फलफुल वितरण गरिएको थियो। प्रेस चौतारी नेपालको स्थापना दिवसको अवसर पारेर सोमबार अस्पतालमा रहेका बिरामीहरूलाई फलफुल वितरण गरिएको हो।
प्रेस चौतारीको स्थापना दिवसकै अवसरमा सोमबार नै जिल्ला सदरमुकाम गौरमा अन्तरक्रिया कार्यक्रम समेत गरिएको थियो। अन्तरक्रिया कार्यक्रममा बोल्दै प्रमुख अतिथि नेकपा एमालेका केन्द्रीय सदस्य गुप्ताले नेकपा एमालेले गरेका राम्रा कामको विरोध गर्नेहरूलाई प्रेस चौतारीमा आबद्ध सञ्चारकर्मीहरूले जवाफ दिनुपर्ने बताएका थिए।
देशको राम्रो र गौरवशाली पार्टी नेकपा एमाले भएको र एमालेले गरेका राम्रा कामलाई प्रेस चौतारी आबद्ध सञ्चारकर्मीहरुले खुलेर लेख्नुपर्ने उनले बताएका थिए। सो कार्यक्रममा नेकपा एमालेको लेखा आयोगका केन्द्रीय सदस्य राजकिशोर यादवले शुभकामना मन्तव्य व्यक्त गरेका थिए।
प्रेस चौतारी नेपाल मधेश प्रदेशका महासचिव गौतम श्रेष्ठले स्वागत मन्तव्य राखेको सो अन्तरक्रिया कार्यक्रममा प्रेस चौतारी नेपालका केन्द्रीय सदस्य रमेश तिमल्सिना संजय मिश्रा, नेपाल पत्रकार महासङ्घका मधेस प्रदेश सदस्य शैलेन्द्र झा, प्रेस चौतारी नेपाल रौतहटका संस्थापक अध्यक्ष शैलेन्द्र गुप्ता, नेकपा एमाले मधेश प्रदेश सदस्य बालविक्रम कार्की लगायतको उपस्थिति रहेको थियो।
प्रेस चौतारी नेपाल रौतहटका अध्यक्ष उत्तम कुमार उपाध्यायको अध्यक्षतामा भएको अन्तरक्रिया कार्यक्रम चौतारीका जिल्ला सचिव मुकेश कुमार शाहले सञ्चालन गरेका थिए।न्युजकारखाना
काठमाडौं, २२ माघ ।
स्वास्थ्य सेवा विभागले दादुरा–रुबेलाविरुद्धको ६० लाख ७५ हजार मात्रा खोप नेपाल आइपुगेको जनाएको छ। अन्तराष्ट्रिय संस्था गाभीको सहयोगमा खोप सोमबार नेपाल ल्याएको बताइएको छ।
विभागले उक्त खोप ५७ लाख बालबालिकालाई लगाउने कार्यक्रम रहेको जनाएको छ। भारतसँग जोडिएका १९ जिल्ला र काठमाडौं उपत्यका गरेर २४ जिल्लाका ९ महिनादेखि १५ वर्षसम्मका बालबालिका र बाँकी ५१ जिल्लाका ९ महिनादेखि ५ वर्षसम्मका बालबालिकालाई खोप लगाउने योजना विभागको छ।
देशभर सम्भावित संक्रमणको जोखिमलाई मध्यनजर गरेर फागुन १३ गतेदेखि चैत ७ गतेसम्म खोप अभियान सञ्चालन गर्ने योजना रहेको स्वास्थ्य सेवा विभाग बाल स्वास्थ्य तथा खोप शाखा प्रमुख डा. अभियान गौतमले बताए।
दादुरा र रुबेलाको खोप अभियान यसअघि जाजरकोट र पश्चिम रुकुममा सञ्चालन गरिसकेको छ। सरकारको सन् २०२६ सम्म दादुरा–रुबेला निवारण गर्ने लक्ष्य छ।न्युजकारखाना
काठमाडौं, २२ माघ ।
सभामुख देवराज घिमिरेले सभामुख र उपसभामुखको अनुपस्थितिमा बैठक सञ्चालन गर्न सात सदस्य टिम मनोनीत गरेका छन्।
आजबाट सुरु भएको संसद्को हिउँदे अधिवेशनको सुरुआत गर्दै सभामुख घिमिरेले सांसद्को टिम छनोट गरेका हुन्।
प्रतिनिधिसभाको बैठकमा प्रतिनिधिसभा नियमावली, २०७९ को नियम १० बमोजिम बैठकको अध्यक्षता गर्न सात सदस्य मनोनयन गरेका हुन्।
सभामुखमा सांसद ईश्वरीदेवी न्यौपाने, कृष्णगोपाल श्रेष्ठ, चन्दा कार्की भण्डारी, प्रतीक्षा तिवारी, विमला सुवेदी, बुद्धिमान तामाङ, रामकृष्ण यादवलाई मनोनयन गरेको सभामुख घिमिरेले बताए।न्युजकारखाना
ओम प्रकाश् यादव माघ २२ गते, रौतहट।
एक महिनाको लामो तलाबन्दी पछि रौतहटको गरुडा नगरपालिकाको ताल्चा आज खुलेको छ । एक महिना भन्दा बढी दिन्देखी गरुडा नगरपालिका कार्यालयमा लगाइएको ताला सोमबार बेलुका ७ बजे खुलेको हो ।
नगर उपप्रमुख पुनम देवि चौधरी सहित ६ जना वडा अध्य
क्षहरुले विभिन्न माग राख्दै बिगत एक महिना देखि नगरपालिका कार्यालयमा तालाबन्दी गरि मुलगेटमा धार्ना दिदै आएका थिए । नगर प्रमुख कन्थमनि प्रसाद जयसवालले आन्दोलनरत जनप्रतिनिधिहरुको माग सम्बोधन गर्ने लिखित सहमति गरेपछी नगर उप प्रमुख चौधरी सहित आन्दोलनरत वडा अध्यक्षहरुले आज ताल्चा खोलेका हुन ।
जिल्ला प्रशासन कार्यालय गौर रौतहटमा मेयर जयस्वाल र आन्दोलनरत पक्ष बीच विभिन्न बुदामा लिखित सहमति भएपछी आन्दोलनरत जनप्रतिनिधिहरुले आन्दोलनका कार्यक्रम फिर्ता लिदै पालिका कार्यालयमा लगाएको ताल्चा खोलेका छन । ताल्चा खुलाउन जिल्ला प्रशासन कार्यालय रौतहटमा यस् अघि दुबै पक्ष बिच पटक पटक वार्ता हुँदै आएपनि कुरा न मिलेपछी उक्त वार्ता असफल हुँदै आएको थियो ।
तर सोमबार पुनः जिल्ला प्रशासन कार्यालयमा दुबै पक्ष बिच भएको वार्तामा सहमति जुटेको थियो । आजको वार्ता सफल भएपछी गरुडा नगरपालिकाका मेयर, उप मेयर, वडा अध्यक्षहरुबिच लामो समय देखि हुँदै आएको आपसी द्वन्द, मनमुटाव, मतभेद र विवाद अन्त्य भएको छ ।
काठमाडौं, २२ माघ ।
प्रतिनिधिसभाको बैठक सकिएको छ। हिउँदे अधिवेशनको रुपमा आजबाट सुरु भएको बैठक माघ २४ गते बस्ने गरी स्थगित भएको हो।
आजको बैठकमा सभामुख देवराज घिमिरेले राष्ट्रपति कार्यालयबाट आएका पत्र पढेर सुनाएका थिए। सरकारका तर्फबाट भएका महत्त्वपूर्ण निर्णय, मन्त्रीहरूको विदेश भ्रमण तथा कार्यवाहक जिम्मेवारी तोकिएको बारे पनि बैठकमा सभामुख घिमिरेले पढेर सुनाएका थिए।
बैठकमा अर्थमन्त्री डा. प्रकाशशरण महतले आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, २०८० पेस गरेका छन्।
कानुन, न्याय तथा संसदीय मामिलामन्त्री धनराज गुरुङले मन्त्रिपरिषद्को निर्णयबाट जारी भएको बेपत्ता पारिएका व्यक्तिको छानबिन, सत्यनिरुपण तथा मेलमिलाप आयोग ऐन, २०७१ को दफा ४२ बमोजिमको बाधा अड्काऊ फुकाऊ आदेश सदनमा पेस गरेका छन्।
राष्ट्रियसभामा उत्पत्ति भएको विद्युतीय व्यापार विधेयक, २०८० र राष्ट्रिय मर्यादासम्बन्धी विधेयक, २०७९ का सम्बन्धमा राष्ट्रियसभाबाट प्राप्त सन्देशसहितको विधेयक पनि टेबुल भएको छ।न्युजकारखाना
