आरके श्रीवास्तव,राैतहट,०३ गते माघ ।
रौतहट । प्रतिनिधि सभा सदस्य निर्वाचन २०८२ का लागि रौतहट जिल्लामा कायम मतदाता, मतदान स्थल र मतदान केन्द्रसम्बन्धी विवरण सार्वजनिक भएको छ । जिल्ला निर्वाचन कार्यालय रौतहटका अनुसार जिल्लाभर कुल ४ लाख ३६ हजार ६११ मतदाता रहेका छन् ।
रौतहट जिल्लामा ४ वटा प्रतिनिधि सभा निर्वाचन क्षेत्र रहेका छन् । ती क्षेत्रमा जम्मा १५७ वडा, २७७ मतदान स्थल र ५४१ मतदान केन्द्र तोकिएका छन् ।
निर्वाचन क्षेत्रगत रूपमा हेर्दा निर्वाचन क्षेत्र नं. ४ मा सबैभन्दा बढी १ लाख १० हजार ३१४ मतदाता रहेका छन् । यस क्षेत्रमा ३० वडा, ६१ मतदान स्थल र १३४ मतदान केन्द्र छन् । यसपछि निर्वाचन क्षेत्र नं. २ मा १ लाख ८ हजार ८७२, निर्वाचन क्षेत्र नं. १ मा १ लाख ८ हजार ७२६ र निर्वाचन क्षेत्र नं. ३ मा १ लाख ८ हजार ६९९ मतदाता रहेका छन् ।
लैंगिक आधारमा हेर्दा रौतहट जिल्लामा पुरुष मतदाता २ लाख ४० हजार २६७ र महिला मतदाता १ लाख ९६ हजार ३४३ रहेका छन् । अन्य लिङ्गका मतदाता १ जना मात्र रहेको जिल्ला निर्वाचन कार्यालयले जनाएको छ ।
निर्वाचन क्षेत्र नं. १ मा ६० हजार २६९ पुरुष र ४८ हजार ५९७ महिला मतदाता छन् । निर्वाचन क्षेत्र नं. २ मा ६१ हजार १९४ पुरुष र ४७ हजार ६७८ महिला, निर्वाचन क्षेत्र नं. ३ मा ५९ हजार ९६८ पुरुष र ४८ हजार ७३० महिला तथा निर्वाचन क्षेत्र नं. ४ मा ५८ हजार ८३६ पुरुष र ५१ हजार ४७८ महिला मतदाता रहेका छन् ।
जिल्ला निर्वाचन कार्यालय रौतहटका अनुसार तोकिएका मतदान स्थल र केन्द्रमा आवश्यक पूर्वतयारी समयमै पूरा गरी निर्वाचनलाई स्वच्छ, निष्पक्ष र शान्तिपूर्ण रूपमा सम्पन्न गरिनेछ ।
